لبلكونات مبقتش زى زمان مكان للكراكيب والاغراض الى مش عايزنها بس دلوقتى بقى يتعمل فيها اجمل الديكورات والتزين حتى لو البلكونة بتاعتنا صغيرة فممكن برضو نزينها .ونعملها بطريقة جميلة جدا
ولما نيجى نتكلم على البلكونات لازم نفتكر الاسترخاء والاستجمام الى بنحصل عليه من البلكونة وكمان من المفيد جدا اننا نغير الروتين بتاعنا ونعمل الانشطة بتاعتنا زى الفطار او شرب القهوة فى البلكونة فى الهواء الطلق ودة هيحسن مزاجك جدااا ويمدك بالطاقة الايجابية الى بتحتاجها عشان تكمل يومك وتستحمل ارهاق الشغل المعتاد.
من الحاجات المميزة الى ممكن نعملها فى البلكونة لو فى مساحة متوفرة هى اننا نحط فيها كراسى وترابيزة حتى لو كرسين فقط وكمان نزرع ورد ونحطه على الشرفة بتخلى منظر البلكونة مريح جداا للعين والاعصاب والورد من عوامل الديكور المميزة
ممكن لو مساحة بلكونتك صغيرة ومش هتقدرى تحطى فيها كراسى وترابيزة ممكن تحطى فيها مرجيحة لونها فاتح وحلوة زى الصورة او كرسى مرجيحة صغير برضو وبدال ما احنا متعودين نقرأ فى الصالة او غرف النوم يبقى نغير الروتين ونقرأ فى البكونة
وممكن نضيف رفوف خشبية او مكتبة صغيرة فى حيطة البلكونة ونحط عليها كتبنا المفضلة
خلى دهان حوائط البلكونة بلون فاتح ومشرق عشان يضيف بهجة وجو مرح للمكان وكمان متنسيش ترتبى النباتات فى البلكونة عشان منبوظش ديكور البلكونة بتاعتنا وممكن تعلقيهم على الحيطة ولكن لو فى مساحة حطى النباتات والزهور على الارض هتخلى الشكل احلى 
ممكن نضيف للبلكونة بتاعتنا طابع رومانسى وجميل بوضع شموع او فوانيس كنوع من الاضاءة والرومانسية كمان
عشان ندى للبلكونة بتاعتنا طابع زى الحدائق كدة ممكن نعمل ارضية عشبية جميلة وكمان شكل جميل ورائع للبلكونة حتى لو كانت المساحة متوسطة.
